မွန်မြတ်တဲ့အလှူတစ်ခုကိုပြုလုပ်ခဲ့ပြန်တဲ့ သရုပ်ဆောင် ပိုင်တံခွန်

သရုပ်ဆောင် ပိုင်တံခွန်ကတော့ ဒေါ်ခင်ကြည်ဆေးရုံက မွေးလူနာ တစ်ဦးအတွက် လိုအပ်နေတဲ့ သွေး တစ်လုံးကို လှူဒါန်းခဲ့တယ်လို့ သိရပါတယ်။ မွေးလူနာဟာ A(+) သွေးဖြစ်တာကြောင့် ပိုင်တံခွန်ကလည်း သွေးအမျိုးအစား တူတဲ့သူ ဖြစ်တဲ့ အတွက် ကိုယ်တိုင်ဆက်သွယ်ပြီး သွေးလာလှူတာလို့လည်း ဓာတ်ပုံဆရာရဲဟိန်းက အခုလို ပြောပြထားပါတယ်။

“ညကတစ်ညလုံး ရှာနေရတဲ့သွေးကို မနက် ၄:၃၀ အချိန်မှာ ချစ်ညီလေး Paing Takhon က ကိုကြီးကျွန်တော်လှူချင်ပါတယ် ဆိုပြီးလှမ်းပြောတာနဲ့ သူ့အိမ်သွားခေါ် တစ်ညလုံးမအိပ်ပဲ ခုချိန်ထိ ထိုင်စောင့်ပြီး လိုက်ကူညီပေးတယ်။ ခုလိုကူညီတတ်တဲ့စိတ်လေးတွေရှိတာ ဝမ်းသာပါတယ် ချစ်ညီလေးရေ သွေးစစ်အဖြေအကုန်ကောင်းလို့လည်း ပိုဝမ်းသာမိပါတယ်။ နောက်လည်း အရေးပေါ်ချိန်တွေမှာ ကူညီပေးနိုင်ပါစေ ညီလေးရေ” ဆိုပြီးတော့ စက်တင်ဘာလ (၂၃) ရက်နေ့က ဓာတ်ပုံဆရာ ရဲဟိန်းရဲ့ ဖေ့စ်ဘွတ်စာမျက်နှာမှာ ရေးသားခဲ့တာဖြစ်ပါတယ်။ ပိုင်တံခွန်ရဲ့ သွေးအလှူ အမှတ်တရ ဓာတ်ပုံတွေကို ဓာတ်ပုံဆရာရဲဟိန်းရဲ့ ဖေ့စ်ဘွတ်အကောင့်မှာလည်း တင်ထားတာ တွေ့ရပါတယ်။ ဒီဓာတ်ပုံတွေထဲမှာ ပိုင်တံခွန်ဟာ သွေးလှူခွင့်ရလို့ ပျော်ရွှင်နေတာကို တွေ့ရပါတယ်။

ပိုင်တံခွန်ဟာ စက်တင်ဘာလ(၁၇)ရက်နေ့တုန်းက အသက်(၂၄) နှစ်ပြည့်ခဲ့တာ ဖြစ်ပါတယ်။မကြာသေးခင်ကလည်း ထိုင်းမှာရောက်နေတဲ့ ပိုင်တံခွန်ရဲ့ ပရိသတ်အချို့ဟာ သူ့ရဲ့မွေးနေ့အတွက် ရည်ရွယ်ပြီး သွေးလှူဒါန်းပေးခဲ့ကြတာတွေ့ရပါတယ်။ပိုင်တံခွန်အနေနဲ့လည်း သူ့ရဲ့ မွေးနေ့မှာ ရန်ကုန်ကပရိသတ်တွေနဲ့ အတူတူ သွေးလှူချင်ပေမယ့် Covid ကာလမှာ လူစုလူဝေး မဖြစ်စေချင်လို့ လှူခွင့်မရခဲ့ဘူးလို့လည်း သိရပါတယ်။

• Mg Kaung