ရန်ရန်ချမ်းအစား ကျားပေါက်ကိုရွေးချယ်ရတဲ့ အကြောင်းအရင်းကိုပြောပြလာတဲ့ တိုးကြီး

ပြီးခဲ့တဲ့တနင်္ဂနွေနေ့မှာ ပြသခဲ့တဲ့ The Voice Myanmar Season 3 ရဲ့ Blind Audition ယှဉ်ပြိုင်မှုမှာ Coach ၄ ဦးစလုံး လှည့်ကြည့်ခံရတဲ့ ပြိုင်ပွဲဝင် တိုးကြီးကတော့ အဆိုတော် ရသရဲ့ “တစ်ခါတုန်းက” သီချင်းနဲ့ ယှဉ်ပြိုင်ခဲ့တဲ့အတွက် လူအများရဲ့ စိတ်ဝင်စားမှုကို ရရှိခဲ့ပါတယ်။ဘာကြောင့် ရသရဲ့ သီချင်းနဲ့ ယှဉ်ပြိုင်ခဲ့တာလဲဆိုတာ တိုးကြီးက အခုလို ပြောပြခဲ့ပါတယ်။“ဂီတကတော့ အမျိုးစုံပဲလေ။ တခုချင်းစီမှာ သဘောကျရတဲ့ အထင်ကရဖြစ်တဲ့ ပုဂ္ဂိုလ်တွေ ရှိတယ်။ မြန်မာနိုင်ငံ Rap Music မှာဆိုရင်လည်း ကိုရသကို အကြိုက်နှစ်သက်ရဆုံးလူ ဖြစ်တယ်။ ကိုရသက အခုဆိုရင် အားလုံးလို လွတ်လပ်တဲ့သူ တယောက် မဟုတ်ဘူးလေ။

ကိုရသကို သတိရပြီးသားလူတွေရော၊ ကိုရသဆိုတာ ဘယ်လိုလူလဲဆိုတာကို ၂၀၀၀ ခုနှစ်နောက်ပိုင်းမှာ မွေးတဲ့ လူငယ်လေးတွေ သိမှာမဟုတ်ဘူး။ ထင်တာပဲနော်။ သူတို့အရွယ်မှာဆိုရင်လည်း ကိုရသသီချင်းတွေကို ပြန်တူးဆွရတော့မယ်”။“ကိုရသရဲ့ပရိသတ် အစစ်အမှန်တွေဆိုရင်လည်း သူ့အတွက် သတိရစရာတခုခု ဖြစ်သွားမယ်ဆိုရင်လည်း နောက်နှစ်မှာ ကိုရသကို ထပ်ပြီး တွေ့ချင်နေပြီ။ ဒါဟာ တနည်းနည်းနဲ့ ဖိအားပေးခြင်း တမျိုးပဲပေါ့နော်။ ကိုရသကို လွတ်ငြိမ်းချမ်းသာခွင့်ပေးဖို့အတွက် ဆိုဖြစ်ခဲ့တာပါ” လို့ တိုးကြီးက ဧရာဝတီကို ပြောပါတယ်။အဆိုတော် ရသရဲ့သီချင်းနဲ့ ပြိုင်ပွဲဝင်ဖို့ကိုလည်း ရသရဲ့မိဘများထံ ကိုယ်တိုင် သွားရောက် ခွင့်တောင်းခဲ့ပြီး ကြည်ကြည်ဖြူဖြူနဲ့ ခွင့်ပြုခဲ့တာဖြစ်တယ်လို့ သိရပါတယ်။Rap သီချင်းနဲ့ပြိုင်ခဲ့ပေမယ့် Coach ရွေးချယ်တဲ့အခါမှာတော့ Rapper တယောက်ဖြစ်တဲ့ ရန်ရန်ချန်းကို မရွေးချယ်ခဲ့ဘဲ အဆိုတော် ကျားပေါက်ကို ရွေးချယ်ခဲ့တဲ့အကြောင်းကိုလည်း အခုလို ပြောပြခဲ့ပါတယ်။

“ကျနော်က အားလုံးအနေနဲ့ ထင်ကြမှာက Rap တွေ ရွတ်တယ်ဆို ကိုရန်ရန်ချန်းဆီ သွားမယ် ထင်ကြတယ်ပေါ့။ ကျနော်က Rapper တယောက်အနေနဲ့ ဖြစ်တည်နေတာမျိုးတော့ မဟုတ်ဘူး။ ကျနော့်အလုပ်က အသံဖမ်း အင်ဂျင်နီယာ ဖြစ်တဲ့အတွက် ဂီတပေါင်းစုံနဲ့ မစိမ်းဘူး။ အဓိကက ဂီတကို ဖန်တီးချင်တာ။ သီချင်းတွေ ဖန်တီးချင်တာ။ ဒီဇိုင်းအမျိုးမျိူးပေါ့။ အတီးအခတ်နဲ့ အဆိုကို ပေါင်းလိုက်တဲ့ အချိန်မှာ Music တခုခု ထွက်လာမယ်လို့ မျှော်လင့်ထားတယ်” လို့ တိုးကြီးက ပြောပါတယ်။တိုးကြီးကတော့ အသံဖမ်းအင်ဂျင်နီယာ တယောက်အနေနဲ့ ကိုယ်ပိုင် စတူဒီယိုတခုကို တည်ထောင်ထားတာ ၇ နှစ်ကျော်ခန့် ရှိနေပြီဖြစ်ပြီး The Voice Myanmar ကတော့ သူ့ရဲ့ပထမဆုံး ဝင်ပြိုင်တဲ့ အကြီးမားဆုံးပြိုင်ပွဲ ဖြစ်တယ်လို့ သိရပါတယ်။

• Mg Kaung