မွေးနေ့မှာ ပရိသတ်တွေနဲ့မဆုံဖြစ်လောက်တော့ဘူးလို့ဆိုလာတဲ့ စိုးပြည့်သဇင်

သရုပ်ဆောင် စိုးပြည့်သဇင်က စက်တင်ဘာလ(၂၂) ရက်နေ့ ဆိုရင် မွေးနေ့ ကျရောက်ပြီဖြစ်ပါတယ်။ ကိုဗစ်ကာလ ဖြစ်တာကြောင့် အရင်နှစ်မွေးနေ့တွေလို သူမရဲ့ ပရိသတ်တွေနဲ့ မဆုံဖြစ်လောက်တော့ဘူးလို့ပြောပြလာပါတယ်။

“ စိုးပြည့်ကတော့ မွေးနေ့ နှစ်တိုင်းကို Fan တွေနဲ့ အလှူအတန်းတွေ လုပ်ဖြစ်တယ်၊ မွေးနေ့ကိတ်ခွဲတယ်။ အမှတ်တရလေးတွေလုပ်ဖြစ်တယ်။ ဒီနှစ်မွေးနေ့တော့ အလှူအတန်းလောက်ပဲ စိုးပြည့်လုပ်ဖြစ်မယ်။ စိုးပြည့်မွေးနေ့က အခုလာမယ့် (၂၂) ရက်နေ့ ဆိုတော့ အခြေအနေတွေက ဘာဖြစ်လာမလဲဆိုတာ ပြောပြလို့ မရသေးဘူးရှင့်” လို့ သူက ဆိုပါတယ်။ စိုးပြည့်သဇင်ဟာ ကိုဗစ်ကာလဖြစ်တာကြောင့် အနုပညာအလုပ်တွေလည်း ရပ်နားထားတယ်လို့ သိရပါတယ်။ ခြွေတာသင့်တာကို ခြွေတာပြီး ကိုဗစ်ကာလကို ဖြတ်သန်းနေတယ်လို့ ဆက်လက် ပြောပြလာပါတယ်။

“ စိုးပြည့်အတွက်ကတော့ Stay Home ကာလက အရမ်းကြီး သိသာထူးခြားတာမျိုးတော့ မရှိဘူး။ အရင်တုန်းကတည်းက စိုးပြည့်က အလုပ်ရှိရင် အလုပ်သွားတယ်၊ အလုပ်မရှိရင် အိမ်ပြန်တယ်။ ကိုယ်က အိမ်မှာပဲ နေဖြစ်တာ များတဲ့သူဆိုတော့ အရမ်းကြီးထူးခြားတာမရှိဘူး။ မိသားစုတွေနဲ့ကလည်း အမြဲတမ်း အတူတူနေဖြစ်ပါတယ်။ အခုချိန်မှာ လူတန်းစားအားလုံး စီးပွားရေးထိခိုက်ကြတာပဲ အဲဒီအတွက် သုံးသင့်တာသုံး၊ ခြွေတာသင့်တာ ခြွေတာရမှာပါပဲ” လို့ဆက်လက်ပြောပြသွားခဲ့ပါတယ်။

• Mg Kaung