ကိုဗစ်ကာလမှာ မိသားစုဝင်တွေ ခိုးဆိုးလုယက်ခံရပုံကို ဖွင့်ဟလာတဲ့ သရုပ်ဆောင် ရှင်မွေလ

မြန်မာနိုင်ငံမှာ ကိုဗစ် ဒုတိယလှိုင်းပြန်လည်စတင်လာတာနဲ့အညီ ကိုဗစ်ကာလဟာလည်း ပိုပြီးရှည်ကြာလာခဲ့ပါတယ်။ အဲ့ဒီလို ကိုဗစ်ကာလရှည်ကြာမှုကြောင့် စီးပွားရေး အဆင်မပြေမှုတွေဖြစ်ပေါ်ပြီး စားဝတ်နေရေးကျပ်တည်းမှုတွေဖြစ်ပေါ်လာကာ အချို့သောနေရာမှာတွေတော့ ခိုးဆိုးလုယက်မှုတွေပါဖြစ်ပေါ်လာတာဖြစ်ပါတယ်။MRTV-4 ရဲ့ ဇာတ်လမ်းတွဲမင်းသားဖြစ်တဲ့ ရှင်မွေလရဲ့ မိသားစုဝင်တွေဟာလည်း ကိုဗစ်ကာလမှာ ခိုးဆိုးလုယက်မှုတွေနဲ့ ကြုံတွေ့ခဲ့ရတယ်လို့သိရပါတယ်။ ဒီအကြောင်းကို ရှင်မွေလက အခုလိုပဲပြောပြပါတယ်။

” ရေရှည်သာ အခုလို ဖြစ်ရင် အဆင်မပြေဖြစ်ကြမယ်ထင်ပါတယ်။ အခုဆို လုတာ ယက်တာတွေလည်း များနေတယ်။ ကျွန်တော့်ညီလေးဆိုရင် ဟိုတလောက ဖုန်းအလုခံရတယ်။ အမတစ်ဝမ်းကွဲဆိုရင်လည်း ဖုန်းလုရင်း ခေါင်းပါရိုက်သွားတာ…အဲ့လို ထွေထွေထူးထူး သတင်းအနေနဲ့ ဆိုရှယ်မီဒီယာမှာ မရေးပြတာပဲ ရှိတယ်။ ကိုယ့်အထင်ကတော့ စီးပွားရေးတွေ ယိုယွင်းလာလို့ အဲ့လိုဖြစ်ကြတာလို့ ထင်တယ်။ အဲ့အတွက်လည်း အရမ်းစိတ်ပူတာ ကိုယ်တိုင်လည်း အရင်ထက်စာရင် အလုပ်က တော်တော်ရှားတယ်။ တချို့ကျ ရင်းနှီးထားရတာတွေ ပျက်စီးတာ ဆုံးရှုံးတာတွေ ရှိတယ်။ အဲ့လိုတွေ မြင်ရတဲ့အခါ တကယ်စိတ်မကောင်းဘူး။ ကျွန်တော် အမှန်အတိုင်းပြောရရင် ကိုဗစ်ကြီးကို တော်တော်မုန်းနေပြီ။

အဓိကကတော့ လမ်းသွားတဲ့အခါ ရွှေတွေ ဝတ်တာမျိုး မဟုတ်ပဲ ပေါ့ပေ့ါပါးပါးလေး ဝတ်သွားတာမျိုး ဖုန်းဆိုလည်း လက်ထဲမှာ ကိုင်ထားတာ မဟုတ်ပဲ အိတ်ထဲမှာ ထည့်ထားပြီးမှ သွားတာမျိုး လုပ်စေချင်တယ်။အမကိုဆိုရင် ဖုန်းကို လုရုံတင်မကဘူး လူပါရိုက်သွားတာ….ကျွန်တော့်ညီဆိုရင် အိမ်မှာ ဖုန်းကို အားသွင်းထားတာ ဒါပေမဲ့ ကျွန်တော်တို့က သံပန်းတံခါးပဲ ခတ်ထားပြီးတော့ အပြင်တံခါးမကြီးကို မခတ်ထားမိဘူး။ ကျွန်တော့် အမေက နောက်ဖေးခဏသွားတုန်းကို တုတ်ကလေးနဲ့ လှမ်းယူလိုက်တယ် ထင်ပါတယ်။ ညီလေး ဖုန်းကို ယူသွားတဲ့ သူကိုတော့ မမိလိုက်ဘူး။

အမ ဖုန်းကို လုတဲ့သူကကျ ဆိုင်ကယ်နဲ့ မောင်းပြေးသွားတာ..အမက သူ့ဖုန်းကို လုတဲ့အချိန် အမဘက်ကနေ ပြန်ဆွဲတော့ ဖုန်းတော့ မပါသွားဘူး။ ခေါင်းတော့ အရိုက်ခံလိုက်ရတယ်။ အားလုံး စီးပွားရေး အကြပ်အတည်းဖြစ်နေတာဆိုတော့ ရိုးရိုးသားသားနဲ့တော့ ကြိုးစားပြီး ရှာရင် ကောင်းတာပေါ့နော်။ ပစ္စည်းယူသွားတာ ကိစ္စမရှိပေမဲ့ လူပါ လုပ်တာကျ ခံရတဲ့သူလည်း မသက်သာဘူး။ ဒီအချိန်ကြီး ဆေးရုံဆေးခန်းသွားလို့လည်း မကောင်းဘူးလေ။ ထမင်းတနပ်ရှာစားဖို့ အတွက်ကတော့ ရိုးရိုးသားသားနဲ့ ကြိုးစားပြီး ရှာစေချင်ပါတယ် ” လို့ဆိုကာ လတ်တလော ကိုဗစ်ကာလမှာ ကြုံတွေ့နေရတဲ့ အခြေအနေကို ရင်ဖွင့်ခဲ့ပါတယ်။

  • Mg Kaung

Leave a Reply

Your email address will not be published.