တေးသံရှင်ဖြူဖြူကျော်သိန်းရဲ့ ဂီတသက်တမ်း (၁၇)နှစ်ပြည့်မြောက်ခဲ့ပြီဖြစ်

ဖြူဖြူကျော်သိန်းဟာ ၂၀၂၀ ခုနှစ်၊ ဩဂုတ်လ(၁၆) ရက်နေ့မှာ ဂီတသက်တမ်း(၁၇) နှစ်ပြည့်ခဲ့ပြီလို့ ဆိုပါတယ်။ ဂီတသက်တမ်း (၁၇) နှစ်တာမှာ သူမအပေါ် အစစအရာရာ ကူညီပေးခဲ့သူတွေကိုလည်း ကျေးဇူးတင်စကား ဆိုထားပါတယ်။ ” ဒီနေ့ (ဩဂုတ် ၁၆ ရက်)ကဖြူဖြူ့အဆိုတော်သက် (၁၇) နှစ်တင်းတင်းပြည့်တဲ့နေ့ပေါ့။ (၁၇) နှစ်လုံးလုံး ဘာအကြောင်းကြောင့်နဲ့မှ အဆိုတော်ဘဝကိုလွှတ်မချရပဲ တစ်ရက်မပြတ် ဂီတကိုပဲရူးသွပ်၊ ဖက်တွယ် ရှင်သန်ခွင့်ရလို့ ဘုရားသခင်ရဲ့ကျေးဇူးတော်ကိုအထူးချီးမွမ်းသလို ဖြူဖြူ့ ကိုခုချိန်ထိ မေတ္တာကြီးစွာနားလည်ပံ့ပိုးပေးတဲ့မာမီ၊ဖေဖေနဲ့မမညို၊ ဖြူဖြူ့ဂီတ၊အနုပညာ၊သီချင်း၊စိတ်ဓာတ် ၊ခံယူချက်နဲ့အတွေးအခေါ်၊ဖြစ်တည်မှုအသီးသီးကိုချစ်ခင်ယုံကြည်အားပေးကြတဲ့ပရိသတ်တစ်ယောက်ချင်းစီ၊ ဘာမှမဟုတ်ခင်မှာအနုပညာတစ်ခုတည်းကိုကြည့်ပြီးယုံကြည်စွာစင်တင်ပေးခဲ့တဲ့ Iron Cross ကအစ်ကိုဆရာများနဲ့အဆိုတော်သက်တမ်းတစ်လျှောက်သူတို့ရဲ့အကောင်းဆုံးအနုပညာနဲ့ဖြူဖြူ့ကိုလက်တွဲပံ့ပိုးပေးခဲ့ဖူးသမျှလုပ်ဖော်ကိုင်ဖက်များအားလုံး ကို ကျေးဇူး အများကြီးတင်ပါတယ်ရှင်” ဆိုပြီးတော့ သြဂုတ်လ (၁၆) ရက်နေ့ မနက် (၈) နာရီကျော်က သူ့ရဲ့ ဖေ့စ်ဘွတ်စာမျက်နှာမှာ ရေးသားခဲ့ပါတယ်။

ဂီတသက်တမ်း(၁၇) နှစ်ပြည့်တဲ့အချိန်မှာ သူမရင်ထဲက ခံစားချက်တွေကိုလည်း ဖြူဖြူကျော်သိန်းက အခုလို ပြောပြလာပါတယ်။ “ဂီတသက်တမ်း ၁၇ နှစ်မှာ၂၀၂၀ ကတော့ COVID-19 နဲ့အတူ New Normal ရဲ့ပြောင်းလဲမှုတွေကြားဖြူဖြူအပါအဝင်အားလုံးအတွက်စိန်ခေါ်မှုတွေများလွန်းခဲ့ပါတယ်လေ။ ဒီစိန်ခေါ်မှုတွေကပဲဖြူဖြူ့ရဲ့ဂီတအနုပညာသည် ဘဝကိုပိုအဓိပ္ပာယ်ရှိလာစေတယ်လို့ခံစားရပါတယ်။ တစ်သက်လုံးရင်းနှီးကျွမ်းဝင်ဆုံးဖြစ်ခဲ့တဲ့မြေပြင်က physical fandom အပြင် ခေတ်သစ်ရဲ့မရှိမဖြစ် virtual fandomကိုပါစတင်အသက်သွင်းခွင့်ရတာက ဖြူဖြူ့ကိုအဆိုတော်အသစ်တစ် ယောက်လိုအနုပညာ ခွန်အားအပြည့်နဲ့အသစ်တစ်ဖန်ပြန်လည်လန်းဆန်းတက်ကြွစေခဲ့တယ်” လို့ သူက ဆိုပါတယ်။ ဂီတသက်တမ်း(၁၇) နှစ်အတွင်းမှာ သူမကိုယ်တိုင် ရင့်ကျက်ပြောင်းလဲလာခဲ့တာတွေလည်း ရှိတယ်လို့ သိရပါတယ်။ ပရိသတ်ရဲ့ အချစ်တွေကိုလည်း တစ်နှစ်ထက် တစ်နှစ် ပိုပြီးတော့ ပိုင်ဆိုင်ခွင့် ရလာခဲ့တယ်လို့လည်း သူက ဆိုပါတယ်။

“ဖြူဖြူ့ဘဝမှာတစ်ခါမှမဖြစ်ဖူးတဲ့ကိုယ်တိုင်ရေးကိုယ်တိုင်ဆိုအခွေတစ်ခုမွေးဖွားဖို့ကိုယ်ပိုင်သံစဉ်သီချင်းသစ်တွေလည်းတစ်ခွေစာရေးနိုင်လာခဲ့တယ်။ အသက်အရွယ်ကပေးတဲ့ဉာဏ်ပညာနဲ့ရင့်ကျက်မှုတွေအပြင်…ကျန်းမာပျော်ရွှင်နုပျိုလှပယုံကြည်မှုပြည့်ဝနေဖို့အကျင့်ကောင်း၊စနစ်ကောင်း၊နည်းလမ်းကောင်း၊အတွေးကောင်းတွေကိုလည်းအခက်အခဲရင်ကွဲမှုတွေကြားကရခဲ့ပြန်တယ်။ ဖြူဖြူ့ဘဝမှာတစ်ခါမှမရဖူးတဲ့၊ တစ်ခါမှမမျှော်လင့်ဖူးတဲ့၊ ချစ်သူကတောင်မလုပ်ပေးနိုင်ဖူးတဲ့ လက်ဆောင်တွေရတယ်။ အဲ့ဒီလက်ဆောင်တွေကလူတွေထင်သလိုပိုက်ဆံတန်ဖိုးကြီးတဲ့လက်ဆောင်တွေမဟုတ်ဘူး။ အချစ်တွေ၊မေတ္တာတွေ၊တန်ဖိုးထားမှုတွေ၊နားလည်မှုတွေ၊ယုံကြည်မှုတွေကနေဖြစ်လာတဲ့ကရိကထခံလုပ်ဆောင်ပေးမှုတွေကနေပေါ်ထွက်လာတဲ့လက်ဆောင်လေးတွေ(ဒီအကြောင်းက post တစ်ခုသက်သက်တင်ရဦးမှာ )ဒီနှစ်ပိုပျော်တယ်။ ဒီနှစ်ပိုပြည့်စုံတယ်လို့ခံစားရတယ်။ အဲ့ဒီအတွက်အရာအားလုံးကိုကျေးဇူးတင်ပါတယ်။ ပိုလည်းကြိုးစားနေပါ့မယ်ချစ်တဲ့ ဖြူဖြူ” ဆိုပြီးတော့လည်း ဆက်လက် ရေးသားထားခဲ့တာဖြစပါတယ်။

• Mg Kaung