ရုပ်ရှင်နဲ့ဗွီဒီယိုရိုက်ကူးခွင့်တစ်နှစ်အပိတ်ခံလိုက်ရတဲ့ ယုန်​လေး

အဆိုတော်ယုန်လေးကိုယ်တိုင် ပုံဖော်ရိုက်ကူးထားတဲ့ “ စည်းလုံးသင့်ပြီ မြန်မာပြည် ”MTV နဲ့ ပတ်သက်ပြီး မြန်မာနိုင်ငံ ရုပ်ရှင်အစည်းအရုံးမှ အမှုဆောင်အဖွဲ့ဝင်များဟာ သြဂုတ်လ (၇) ရက်နေ့ မနက်ပိုင်းက ဆွေးနွေးမှုပြုလုပ်ခဲ့တာတွေ့ ရပါတယ်။ အဆိုတော်ယုန်လေးကိုတော့ အနုပညာအလုပ်တွေလုပ်ကိုင်ဖို့ တစ်နှစ်တိတိ ပိတ်လိုက်ပြီလို့ မြန်မာနိုင်ငံ ရုပ်ရှင်အစည်းအရုံး ဥက္ကဌ ဦးညီညီထွန်းလွင်က မီဒီယာတွေကိုပြောပြလာပါတယ်။

“ အဆိုတော် ယုန်လေးကို တစ်နှစ်တိတိ အနုပညာအလုပ်တွေ မလုပ်ဖို့ ရပ်နားခိုင်းလိုက်ပါပြီ။ ဒါရိုက်တာ အလုပ်ကိုရော၊ သရုပ်ဆောင်အလုပ်ကိုရော၊ သီချင်းတွေ ဆိုတာရော ဘာတစ်ခုမှ လုပ်ခွင့်မရှိ ရပ်နားလိုက်တာပါ။ ရုပ်ရှင်အစည်းအရုံးကနေပြီးတော့ ထုတ်ပယ်လို့ မရဘူးဆိုတာကလည်း ယုန်လေးဟာ အရင်ကတည်းက အစည်းအရုံးဝင်တစ်ယောက် မဟုတ်တဲ့အတွက်ထုတ်ပယ်လို့မရတာပါ” ဆိုပြီးတော့ သြဂုတ်လ(၇) ရက်နေ့ မနက်ပိုင်းက ရုပ်ရှင်အစည်းအရုံးမှာ ဖြေဆိုခဲ့တာပါ။ယုန်လေးဟာ “ စည်းလုံးသင့်ပြီ မြန်မာပြည်” music video ကို ဇူလိုင်လ (၁၁) ရက်နေ့မှာ ရိုက်ကူးခဲ့တာလို့ သိရပါတယ်။ ကိုဗစ်ကာလအချိန်အတွင်းမှာ ကျန်းမာရေးနဲ့ အားကစားဝန်ကြီးဌာနက လူစုလူဝေး မပြုလုပ်ဖို့ တားမြစ်ထားတဲ့ ကာလဖြစ်ပြီး ယုန်လေးရဲ့ Music Video ဟာ ဒီကာလအတွင်းမှာ ရိုက်ကူးထားတာကြောင့် ဒီ Music Video နဲ့ ပတ်သက်ပြီး စုံစမ်းစစ်ဆေးမှုတွေကိုလည်း ကျန်းမာရေးနဲ့ အားကစားဝန်ကြီးဌာနက တာဝန်ရှိသူများက ဆက်လက် စစ်ဆေးသွားမှာဖြစ်တယ်လို့ ဦးညီညီထွန်းလွင်က ပြောပါတယ်။

“စည်းလုံးသင့်ပြီ မြန်မာပြည် ” Music Video ကို သြဂုတ်လ (၄) ရက်နေ့ မနက် (၁၀) နာရီကျော်က Original Gangster Facebook Page ကနေ ပရိသတ်ကို မိတ်ဆက်ပေးလိုက်တာဖြစ်ပါတယ်။ အဲဒီနောက် ပရိသတ်တွေရဲ့ ဝေဖန်ပြောဆိုမှုတွေကြုံခဲ့ရပါတယ်။ ဒီဝေဖန်ပြောဆိုမှုတွေကြောင့် သြဂုတ်လ (၅) ရက်နေ့ နေ့လယ် (၂) နာရီဝန်းကျင်က အဆိုတော်ယုန်လေးကိုယ်တိုင် Original Gangster Facebook Page ကနေ ဖြုတ်ချလိုက်တာကို တွေ့ရပါတယ်။

• Mg Kaung