ကိုယ်တိုင်ပုံ​ဖော်ရိုက်ကူးထားတဲ့ ဇာတ်လမ်းတွဲ​နှစ်ခုအ​ကြောင်း​ပြောပြလာတဲ့ ဒါရိုက်တာ ​မေဘရဏီ

ဒါရိုက်တာ မေဘရဏီကတော့ အမျိုးသမီးဒါရိုက်တာ တယောက်အနေနဲ့ ၂၀၁၃ ခုနှစ်မှ စတင်ကာ Music Video များကို ရိုက်ကူးခဲ့ပြီး အခုဆိုရင်တော့ ဇာတ်လမ်းတွဲများနဲ့အတူ သူ့ရဲ့ပထမဆုံး ရုပ်ရှင်ဇာတ်ကားကြီးကိုလည်း ရိုက်ကူးထားပြီး ဖြစ်ပါတယ်။လတ်တလောမှာလည်း မေဘရဏီ ရိုက်ကူးထားတဲ့ “နင်ရှိတဲ့ကမ္ဘာ” ဇာတ်လမ်းတွဲကို ပြသနေပြီး မကြာခင်မှာလည်း “ရင်ခုန်သံ ၇၄ ရက်” ဇာတ်လမ်းတွဲကို ထုတ်လွှင့်ပြသတော့မှာ ဖြစ်ပါတယ်။

“ဇာတ်လမ်းတွဲ ၂ ကား ရိုက်တာက ကိုယ့်အတွက် စိန်ခေါ်မှုတခုပဲ။ ဘာဖြစ်လို့လဲဆိုတော့ ဒီ၂ ကားက ရိုက်တဲ့ရက်က အရမ်းကပ်သွားတယ်။ ၂ ခုကို ဆက်တိုက် ရိုက်လိုက်ရတာပေါ့။ ကိုယ့်အနေနဲ့လည်း ပြောရရင် အရမ်းပင်ပန်းသွားတယ်။ ၂ ကားလုံးမှာလည်း တကယ် စိတ်နှစ်ပြီး ကြိုးစားရတယ်။ အရှေ့ကားဆိုရင်လည်း သရဲကားဆိုတော့ ခံစားချက်က တမျိုး၊ နောက်တကားကျတော့ ခံစားချက်က တမျိုး၊ အဲ့ ၂ ကားမှာ ခက်ခက်ခဲခဲ ပြောင်းလဲခဲ့ရတယ်” လို့ မေဘရဏီက ပြောပါတယ်။ဒီလို ဇာတ်လမ်းတွေ ရိုက်တဲ့အခါမှာ ရုပ်ရှင်လောကကို မြှင့်တင်ချင်တဲ့ လူငယ်များက ပူးပေါင်းပြီး အရည်အသွေး ကောင်းမွန်စွာနဲ့ ပရိသတ်ကို ချပြချင်တာဖြစ်တယ်လို့ ဆိုပါတယ်။

“ဒီကားတွေကို ရိုက်တာလည်း လူငယ်တွေပဲပေါ့။ ဒီ ၂ ကားလုံးကိုရိုက်တာလည်း Bonanza Production ပေါ့။ အကုန် လူငယ်တွေ၊ နောက်ပြီးတော့ ဇာတ်လမ်း အသစ်အသစ်တွေ ဖန်တီးပြီးတော့ ဒီလောကကို မြှင့်တင်ပေးချင်တဲ့ လူငယ်တွေ ပူးပေါင်းတဲ့အတွက်ကြောင့် ဇာတ်လမ်းတွေဆိုလည်း ခပ်ဆန်းဆန်းတွေလည်း စဉ်းစားတယ်။ တကယ်လည်း ကွာလတီကောင်းအောင် ရိုက်တယ်။ ပရိသတ်ကိုလည်း အများကြီး ချပြချင်တယ်” လို့ မေဘရဏီက ပြောပြသွားခဲ့ပါတယ်။

• Mg Kaung