ကိုဗစ်ကြောင့် ရပ်နားထားရတဲ့ ရုပ်ရှင်ရိုက်ကူးရေးတွေ ပြန်လည် လုပ်ကိုင်ခွင့်ရပြီ

မြန်မာနိုင်ငံမှာ COVID-19 ကပ်ရောဂါအခြေအနေတွေကြောင့် ရုပ်ရှင်ရိုက်ကူးရေးလုပ်ငန်းတွေကို ရပ်နားထားခဲ့ရတာ သုံးလကျော် လေးလနီးပါးကြာမြင့်ခဲ့ပါပြီ။ကိုဗစ်ကာလအတွင်းမှာ ရိုက်ကူးရေးတွေ ရပ်နားထားခဲ့ရတာကြောင့် ရုပ်ရှင်လောကသားအချို့ စားဝတ်နေရေး ထိခိုက်ခဲ့ရသလို အနုပညာရှင်အချို့ဟာလည်း စီးပွားရေးလုပ်ငန်းတွေ ပြောင်းလဲ လုပ်ကိုင်ခဲ့ကြရပါတယ်။

အခုအခါမှာတော့ မြန်မာနိုင်ငံရုပ်ရှင်အစည်းအရုံးအနေနဲ့ ရုပ်ရှင်ဇာတ်ကား၊ ဗီဒီယို ဇာတ်ကားနဲ့ ရုပ်သံဇာတ်လမ်းတွဲ တွေကို စည်းမျဉ်းစည်းကမ်းနဲ့အညီ ပြန်လည် ရိုက်ကူးခွင့်ရပြီဆိုတာကို ဒီနေ့မှာ ထုတ်ပြန်ကြေညာခဲ့ပါတယ်။ရုပ်ရှင်ဇာတ်ကားတွေ ပြန်လည် ရိုက်ကူးခွင့်ရပြီဆိုတာကို ဇူလိုင်လ (၂၇) ရက်နေ့ မနက်ပိုင်းက မြန်မာနိုင်ငံ ရုပ်ရှင်အစည်းအရုံးရဲ့ တရားဝင် ဖေ့စ်ဘွတ်ပေ့ခ်ျကနေတဆင့် ကြေညာခဲ့တာဖြစ်ပါတယ်။ ရုပ်ရှင်၊ ဗီဒီယိုနှင့် ရုပ်သံဇာတ်လမ်းတွဲများ ပြန်လည်ရိုက်ကူးရာမှာ လိုက်နာရမယ့် စည်းကမ်းချက်တွေကိုလည်း ပြန်ကြားရေးဝန်ကြီးဌာနနှင့် ကျန်းမာရေး ဝန်ကြီးဌာန တို့က မြန်မာနိုင်ငံရုပ်ရှင်အစည်းအရုံးသို့ ပေးပို့လာတဲ့ ထုတ်ပြန်စာထဲမှာ သေချာဖော်ပြထား တာတွေ့ရပါတယ်။

ပြန်ကြားရေးဝန်ကြီးဌာနနှင့် ကျန်းမာရေး ဝန်ကြီးဌာန ထုတ်ပြန်ထားတဲ့ ကြေညာချက်ထဲတွင် ဇာတ်ကားရိုက်ကူးဖို့ ပြင်ဆင်ရာမှာ ကျန်းမာရေးပိုင်းဆိုင်ရာကို လုံခြုံ၊ စိတ်ချဘေးကင်း မှုဖြစ်စေရန်အတွက် လိုအပ်သလို စစ်ဆေးနိုင်ဖို့ ဇာတ်ကား အမည်၊ တစ်ရက်အတွင်းဇာတ်ကား ရိုက်ကူးမည့်ရိုက်ကွင်းနေရာများ၊ ရိုက်ကူးသွားမည့် အချိန် တို့အပြင် ဇာတ်ကားထဲမှာ ပါဝင်သွားမယ့် အနုပညာရှင် လူဦးရေ အတိအကျတို့ကို အနည်းဆုံး အချိန် တစ်ပတ်ခန့်ယူပြီး ပြန်ကြားရေးဝန်ကြီးဌာနနှင့် ပြည်သူ့ ဆက်ဆံရေး ဦးစီးဌာန၊ ရုပ်ရှင်မြှင့်တင်ရေး ဌာနခွဲသို့ တင်ပြလာဖို့လိုအပ်ကြောင်းပါရှိပါတယ်။COVID-19 ကူးစက်ရောဂါကြောင့် ရပ်နားခဲ့ရတဲ့ ရုပ်ရှင်လုပ်ငန်းတွေပြန်လည် လုပ်ကိုင်ခွင့်ရပြီဖြစ်တဲ့ အတွက် အနုပညာလောကသားများဟာလည်း ဝမ်းသာပျော်ရွှင်နေကြောင်း သိရပါတယ်။

  • Mg Kaung

Leave a Reply

Your email address will not be published.